Policia e Prokuroria intervenojnë në këtë qytet të Kosovës

Tre vëzhgues të Nismës për Kosovën në fshatin Banjë të Malishevës janë legjitimuar nga Policia jashtë rrethojës së oborrit të shkollës “Naim Frashëri” që është qendra më e madhe e votimit në këtë fshat.

Prokurori i shtetit, Ramiz Buzhala, tha për KALLXO.com se kanë marrë informatë se në qendrën e votimit në Banjë ka incidente.

“Erdhëm me prokurorin e Krimeve të Rënda, Agron Matjani. Paskën qenë tre vëzhgues të partisë Nisma që paskan mbajtë disa statistika për militantët e partisë që kanë votu. Gjithçka që po ndodhë këtu është jashtë qendrës së votimit. Biseduam me këta, u shpërndanë“, tha prokurori Buzhala.

Tutje, prokurori tha se kanë biseduar me këta persona dhe se u kanë thënë atyre dhe kolegëve të tyre që të mos vinë e të sillen këndej.

Ndërkohë, monitoruesja e BIRN dhe Internews Kosova raporton për prani të shtuar të Policisë në oborrin e shkollës.

Ndërsa, lidhur me tensionet mes Nismës dhe PDK-së në Malishevë, prokurori tha se nuk kanë marrë asnjë ankesë, as nga Policia as nga partitë politike.

Buzhala tha se është hera e tretë sot që vijnë në Banjë jo për shkak të incidenteve por për shkak të informatave jo të sakta.

Zgjedhjet për kryetar këmune po mbahen edhe në komunën e Malishevës.

Në garë janë kandidati i Nismës, Ragip Begaj dhe ai i PDK-së, Mursel Gashi.

SHPËRNDAJE