Stuhia zë familjen shqiptare në det: Shpëtohen 3 anëtarë, një grua ende nuk gjendet

Një ngjarje e rëndë është regjistruar sot në Himarë. Katër pjesëtarë të një familje i ka zënë furtuna në det, për shkak të motit të keq që përfshiu sot vendin.

Bëhet me dije se ata kishin dalë për të mbledhur rrjetat në det. Mësohet se tre anëtarë kanë dalë nga deti, por është në kërkim gruaja. Katër pjesëtarët e familjes rrezikonin të mbyteshin në Gjipe, por tre prej tyre janë shpëtuar nga autoritetet.

Personat e shpëtuar u dërguan në Jalë, ku i priste ambulanca e qendrës shëndetësore Himarë e njoftuar nga Policia Kufitare, dhe ndodhen në spital, jashtë rrezikut për jetën. Ndërkohë, vijonë kërkimet për gjetjen e gruas e cila dyshohet se është mbytur.

Njoftimi i policisë

Himarë -Policia Kufitare dhe roja bregdetare shpëtojnë tre shtetas që rrezikuan të mbyteshin në det, të cilët kishin dalë për peshkim me një mjet të vogël lundrues, i cili u fundos.

Vijon kërkimi intensiv në det, për gjetjen edhe të një shtetaseje që ishte në bordin e këtij mjeti lundrues, e cila dyshohet se është mbytur.

Shërbimet e Policisë kufitare Dhërmi kanë marrë një telefonatë se një mjet lundrues ka dalë në det për peshkim dhe si pasojë e dallgëve të mëdha dhe motit të keq personat që ishin në bord rrezikonin të mbyteshin në Gjipe.

Shërbimet e Policisë Kufitare kanë dalë me mjetin lundrues menjëherë në drejtim të adresës së dhënë dhe kanë njoftuar edhe rojën bregdetare për ndihmë.

Si rezultat i operacionit të përbashkët të Policisë Kufitare dhe rojës bregdetare dhe ndihmës nga një mjet lundrues turistik i rastit, u bë e mundur të shpëtohen shtetasit R. R., F. R. dhe A. R., ndërsa shtetasja M. R. nuk është gjetur ende. Vijojnë kërkimet intensive me mjetet lundruese të Policisë Kufitare dhe të rojës bregdetare.

Personat e shpëtuar u dërguan në Jalë, ku i priste ambulanca e qendrës shëndetësore Himarë e njoftuar nga Policia Kufitare, dhe ndodhen në spital, jashtë rrezikut për jetën.

SHPËRNDAJE